Papaimbestigaran ni ACT Teachers Party-list Representative Antonio Tinio iti Kamara ti koneksyon ti nalawa a panaglayus kadagiti reclamation project idiay Metro Manila ken kabangibang a probinsya.
Segun kenni Tinio, dagiti nasao a proyekto ket saan laeng a mangdaddadael iti aglawlaw nu di ket direkta pay a mangpakpakaro kadagiti panaglayus. Nakaro kunana a naapektaran ket dagiti marigrigat, mannursuro, ken estudyante nga agsaksakripisyo nga inaldaw tapno makastrek iti pagadalan ken kadagiti trabaho da.
Innayon ti mamanday-linteg a nasken ket adda ti agsungbat ken saanen a mabalin nga agtuloy ti kastoy nga aktibidad a maipangpangruna iti mabirukan ngem iti kinatalged ti aglawlaw ken ti nakaad-adu.
Dinakamat ni Tinio ti waragawag ti Advocates of Science and Technology for the People wenno AGHAM a dagitoy a reclamation projects ket addaan iti napeggad nga epekto iti natural ecosystems a nu mabaybay-an ket agbalin a rason dagiti nasaknap a panaglayus.
Impaganeget na a saan a nainkalintegan a madadael dagiti kabaybayan ken pagbiagan dagiti mangngalap kasta met dagiti marigrigat a Pilipino tapno laeng maipangruna iti panangipasdek kadagiti nagkakalawa a casinos, malls, ken condominium units.
