Manamnama a manayunan iti bilang dagiti turista a Ruso a sumarungkar ditoy Pilipinas kalpasan a kiniddaw ti sumagmamano a kompania ti eroplano ti Russia a mangiyusuat iti direkta a panagtayab manipud Russia kadagiti kangrunaan a destinasion ti turismo iti pagilian.
Iti pannakiuman ni PCO Undersecretary ken Palace Press Officer Claire Castro kenni Philippine Ambassador to Russia Igor Garlit Bailen idiay Kazan, Russia, kenuna ni Bailen nga interesado dagiti turista a taga-Russia kadagiti tourist destinations ditoy Pilipinas.
Segun kenni Bailen, idi napan a tawen rinugian ti Russian airline nga IrAero ti chartered flights nga agturong idiay Kalibo, Aklan manipud kadagiti siudad ti Irkutsk ken Khabarovsk iti daya a paset ti Siberia.
Namnamaenda a manayunan pay dagiti direkta a biahe manipud kadagiti dadduma nga airlines tapno ad-adu pay a turista a Ruso iti makabisita ditoy pagilian ken mapadasan iti naidumduma nga hospitality dagiti Pilipino, bayat a palpalawaen ti pagilian dagiti pagtaudan dagiti ganggannaet a turista malaksid iti China, South Korea, ken Estados Unidos.
Innayon ni Bailen nga interesado unay dagiti taga-Russia nga agpasiar iti Pilipinas ken napateg a maallukoy ti ad-adu pay kadakuada gapu iti dakkel a kontribusion dagitoy iti benneg ti turismo.
Dinakamatna pay a karaman ti Thailand, Indonesia, ken Vietnam kadagiti kangrunaan a destinasion dagiti turista a Ruso kadagiti pagilian a paset ti ASEAN.###
