LA UNION – Saan a mapukawan ti namnama dagiti rescuer a masarakan da pay a sibibiag dagiti dinosena a tattao nga agtaltalinaed a mapukpukaw kalpasan ti napasaran da a nakaru a layos nga ibilang da a kakarwan iti napalabas nga henerasyon.
Agingga ita ket agtultuloy ti panagsapol ti emergency teams kadagiti posible a survivor manipud iti nasao a didigra.
Iti agdama, tumul-tulong dagiti ribu a volunteers iti Spanish military ken emergency services iti rescue ken clean-up operation.
Segun kenni Valencia regional president Carlos Mazon, ad-adu pay a tropa iti mai-deploy.
Nagkari met ni Spain Prime Minister Pedro Sanchez nga aramiden ti gobyerno iti amin tapno matulungan dagiti apektado ti kalamidad.
Iti agdama, nasurok 200 a tattao iti nakumpirma a natay ti nalawa a panaglayos, kaadwan ket nailista idiay Valencia region.
Dinadael pay iti nalawa a panaglayos dagiti rangtay ken nabalkot ti pitak dagiti lugar ken nagresulta iti pannakapukaw ti suplay ti kuryente, danum ken taraon kadagiti apektado a komunidad.
Segun iti sumagmamano a residente, adu koma a biag ti naisalbar nu nasap-sapa a nagballaag ken nangipaay ti abiso dagiti lokal nga otoridad seknan iti pangta ti panaglayos.
Kalpasan iti panagduprak ti dakes a panawen idiay Valencia ken Mediterranean coast, agtaltalinaed iti rainfall warning idiay southern Spain gaputi posibilidad ti nakaru a panaglayos idi Sabado kabilang idiay Huelva region ken city of Cartaya a nakapadas ti 2 bulan a kaibatugan ti tudo, a naibuyat iti uneg laeng ti 10 nga oras.
Iti met abagatan a paset ti city of Jerez, ginasut a pamilya ti naiyakar manipud kadagiti babbalay gaputi panagngato ti lebel ti danum kadagiti karayan gapu iti napigsa a panagtudo.
