LA UNION – Nagpalagip ni Mr. Gregorio Cabanban, maysa nga election officer ditoy La Union, iti amin a kandidato a nakipaset iti napalabas a midterm election, nangabak man wenno naabak, a rugyanen iti agsumite ti SOCE wenno Statement of Contributions & Expenditures.
Iti eksklusibo nga interview ti Bombo Radyo La Union kenni Cabanban, inlawlawag na nu kasatnu iti proseso ti panagsubmitir SOCE, nga epektibo idi pay nalpas ti panagbobotos, wenno kabigatan na, Mayo 14.
Mapaway-wayan dagiti kandidato nga agsumite ti SOCE iti uneg ti 30 nga aldaw wenno agingga agturpos ti election period a June 12.
Kinuna na pay a ti pormas ti SOCE ket downloadable iti Comelec website, mangaramid ti uppat a kopya, ipa-notaryo sakbay nga agturong iti opisina ti Comelec a nag-rehistruan tapno isumite ti nasao a dokumento.
Immuna ti daytoy, segun kenni Cabanban a mapatulodan ti notice iti amin a kandidato seknan iti panagaramid ken panagsumite ti SOCE.
Kabilang iti maisumite a kopya ti SOCE iti comelec office, iti amin a resibo iti nagbayadan wenno gastos iti napalabas nga eleksiyon kas koma iti imbayad kadagiti election staff ken watchers, imbayad kadagiti election paraphernalia, gastos iti ads wenno summary of report of advertising contract ken uray iti inawat na a kuwarta wenno kontribusyon ti maysa a kandidato.
Dagiti kandidato a mapaay nga agsumite ti SOCE ket mapatawan ti maiyannatop a pannusa.
Dagiti nangabak a kandidato ket saan da a makatugaw iti puwesto nu saan da a makaisumite ti SOCE idinto a dagiti naabak ket mapatawan da met ti multa, malaksid laeng iti administratibo a kaso.
Innayon pay ni Cabanban, a nakalukat ti opisina ti Comelec inton June 12, a deadline iti panagsumite ti SOCE, iti laksid a regular holiday daytoy, wenno Independence Day.
