Mamati ni Free Legal Assistance Group wenno FLAG Chairperson Atty. Antonio “Audie” Bucoy nga ad-adda pay a napaneknekan iti panagbalin nga authentic ti video ti maipagarup a pangipangta ni Bise Presidente Sara Duterte kenni Presidente Ferdinand Marcos Jr., First Lady Liza Araneta-Marcos, ken sigud nga House Speaker Ferdinand Martin Romualdez.
Daytoy ket kalpasan nga inusar mismo ti defence team ni Duterte ti nadakamat a video iti katengngaan ti impeachment trial.
Segun kenni Bucoy, ti panagusar ti depensa iti video ket nalawag a panangbigbig iti kinapudno ti linaon daytoy.
Nagbalin manen nga isyu ti video kalpasan a napagsusupiatan no ti laeng nasurok dua a minuto wenno ti dandani dua nga oras a full video ti rumbeng a maawat kas ebidensia.
Iti laksid ti panangkontra ti kampo ni Duterte, patien dagiti sumagmamano nga eksperto iti linteg nga adda ti dagsen ti video kas ebidensia iti agtultuloy nga impeachment trial.
Agtultuloy met a mapaspasungadan iti agbalin nga epekto ti panagusar ti video iti taray ti panagusig.###
