Nagpalagip ti National Privacy Commission (NPC) nga iti panagusar ti AI a mangpartuat ti retrato wenno video babaen ti rupa wenno kaing-ingas ti pudno a tao ket mabalin a sakupen ti Data Privacy Act of 2012, nangruna no maisayangkat ken maibinglay nga awanan ti maitutop a legal basis.
Segun iti NPC, dagiti ladawan ken video a pinataud ti AI a mangiladawan iti maysa a tao nga agar-aramid, agsasao, wenno adda iti lugar a saan a napasamak ket mabalin a mangpataud ti biddut a representasion ken privacy risks.
Inlawlawag pay ti komision nga uray dagiti public officials ket maibilang pay laeng a data subject ken saklawen ti linteg, bayat a dagiti kameng ti pamiliada ket adda ti proteksion na a kas pribado nga indibidual.
Kenuna ti NPC a saan nga umdas iti kaadda wenno kaawan laeng ti pammalubos. Masapul nga addaan ti lawful basis, lehitimo a panggep, ken maitutop a panagproseso ti personal a datos maitunos iti Data Privacy Act. Adda met dagiti agdama a pagannurotan ti ahensia nga espesipiko a mangtaming iti pannakausar dagiti sistema ti AI a mangproseso iti personal a datos.
Mabalin a mangipila ti reklamo iti NPC ti tao a nausar ti retrato wenno personal a datos nga awan ti umdas a legal a basaran ken mabalin a kiddawenna iti pannakaikkat ti nasao a content.
Iti sidong ti Data Privacy Act, ti saan nga autorisado a panangproseso iti personal nga impormasion ket madusa iti pannakaibalud ti maysa agingga tallo a tawen ken multa a ₱500,000 agingga ₱2 million, depende iti klase ti panaglabsing.###
