LA UNION – Simmentro iti pammati iti Dios ken panagayat iti pamilya ti nagbalin a kalasag dagiti nangabak iti Kahapon Lamang Special ti Bombo Radyo La Union.
Iti panaglippas ti “Light At The End of the Tunnel” ti Kahapon Lamang Program naitampok ti biag da Emma, Nathalie ken Brave Heart no sadino naaddaan dagitoy ti kabukbukudan a diskarte tapno lumung-aw iti kinarigat ti biag.
Ni Emma a timmakdet nga ama ken ina iti anak na bayat a ti asawa na ket sigid a drug user, nagtrabaho ken insakad na ti panagadalda tapno makaturpos.
Dimmakel iti kinakurapay ngem insakad dagiti nagannak ni Nathalie tapno makaturpos iti panagadal. Nasapa a nakiasawa ngem gestay nagbanag iti panagsina ti relasionda gapu iti pananggulib idi ti lalaki a nagbabawi met laeng iti udina.
Nasapa met a naulila iti ama ni Braveheart ngem gapu iti reggetna a makaturpos ket insakad na ti bagi na ken simrek pay iti nadumaduma a trabaho uray pay iti panag-extra kas katulong.
Naitandudo a 1st prize winner ni Nathalie a maysa itan a mannursuro, 2nd winner ni Braveheart a naragsak iti propesyon na a kina maestra bayat a 3rd winner ni Emma.
Segun kadakuada, uray anya a rigat ti napasaranda ket saan da a nagibbat iti pammati iti Dios ken maaddaan ti napintas a biag.
Agpapada nga immawat ti cash prize a P10,000, P7,500, P5,000 ken certificate dagiti nangabak.
