LA UNION – Inawagan ti chairman ti House Committee on Human Rights a ni Manila Rep. Bienvenido “Benny” Abante Jr. iti testimonya itay kallabes ni sigud a President Rodrigo Roa Duterte idiay Senado, a maysa a legal nga aksyon a biddut.
Daytoy ket kalpasan nga inaklon ti sigud a presidente nga isuna laeng iti addaan responsibilidad para kadagiti aksyon a naaramid iti nadara a kampanya kontra droga iti sidong ti administrasyon na.
Segun kenni Abante, co-chairman ti Quad Committee, iti inaramid a waragawag ni Duterte ket manglukat ti ruangan para kadagiti otoridad nga ikonsidera dagiti kaso, partikular iti sidong ti linteg nga adda pakainaiganna iti command responsibility ken conspiracy.
Inlawlawag ni Abante a ti panangaklon ni Duterte ket sakopen iti probisyon ti Republic Act No. 9851 wenno “Philippine Act on Crimes Against International Humanitarian Law, Genocide, and Other Crimes Against Humanity,” a mangibagbaga a dagiti krimen kontra sangkatawan ket mabalin a maipatungpal.
Kinunana pay nga iti sidong ti Seksyon 10 ti RA 9851, dak-dakamatenna iti Responsibility of Superiors, nga iti sidong daytoy a linteg, iti maysa a superyor ket rumbeng nga agsungbat iti krimen kas maysa a prinsipal para kadagiti krimen nga inaramid ti masakopanna iti sidong ti pammilin ken kontrol, ken napaay a mangaramid ti maitutop nga aksyon.
Impaganetget ni Abante nu kasatnu nga inusar ni Duterte ti “nanlaban” a sarita, a masansan a maus-usar tapno ikalintegan iti panagpatay ti pulis kadagiti operasyon ti droga, ket senyal a dagiti kaso kontra kadagiti karaman iti extrajudicial killings ket nakasagana a maidatag.
Impaganetget pay ni Abante a ti polisiya a kontra-droga ni Duterte ket kaibatugan ti maysa nga opisyal nga allagaden ti estado wenno organisasyon, a mangpatibker iti kaso para iti maysa a nalawa, sistematiko a panang-atake kadagiti sibilyan.
