Suportado ti Malacañang iti agraraira a panangbabalaw dagiti netizen iti social media mainaig ti nababaknang a panagbiag dagiti nabirngasan kas “nepo babies” wenno dagiti annak dagiti contractors ken politiko a karaman kadagiti nakorakot a flood control projects ken dadduma pay a proyekto ti gobierno.
Iti kangitingitan ita ti panagviral dagiti vlogs ken posts a tampok dagiti annak ken kakabagian dagiti contractors kasta met dagiti opisyales ti gobierno ket nakarurodan iti publiko dagiti panangipasikat da kadagiti nagkakangina a bags, biahe ti ballasiw taaw, ken luxurious cars a nagtaud amin iti buis a nagbannogan ti normal a Pilipino.
Segun kenni Palace Press Officer Claire Castro, napateg ti partisipasyon ti gobierno iti panagsuporta kadagiti umili kontra ti korapsyon nangruna ta isuda da met iti makaammo ti pudno a mapaspasamak kadagiti lokalidad da.
Kasaruno daitoy ket nagpanawagan ti Palasyo a dagos nga i-report ti aniaman nga impormasyon mainaig kadagiti maanomalya a proyekto nu kasta ket mapapartak pay ti imbestigasyon ken madusa dagiti adda iti likudan dagiti kinakusit ken iregularidad.
