LA UNION – Nakatuding nga iruar iti sumaruno a lawas ti Catholic Bishops Conference of the Philippines (CBCP) iti ‘oratio imperata’ para iti panag-kalma ken pannaka-resolba ti anyaman a susik iti baetan ti Pilipinas ken China idiay West Philippine Sea .
Adda pakainaiganna daytoy iti kumarkaru a geo-political issue a nangikabil iti dehado a sitwasyon ti Pilipinas, gapu iti panangipilit ti China a tagikua-en iti exclusive economic zone ti Pilipinas.
Kinuna ni CBCP President ken Caloocan City Archbishop Pablo David, iyur-urnos da iti ‘intended prayer’ para iti nasao nga isyu tapno maisapubliko da daytoy inton piyesta ni Saint James inton Hulyo 25.
Agpaut iti kararag a maibasa kadagiti simbaan agingga Enero 1 a mismo a Solemnity of the Mother of God wenno nalatak a World Day of Peace.
