Nagpakdaar ti top diplomat ti European Union (EU) kontra iti maitantandudo a panangi-surrender ti Ukraine kadagiti sumagmamano a teritoryo na idiay Russia kas paset ti peace deal nga inawagan na a patibong laeng ni Russian President Vladimir Putin.
Segun kenni European Commission Vice-President Kaja Kallas nga adda iti listaan ti wanted list ti Kremlin, ti panangamong ti Russia a pagtalinaeden ti kontrol da kadagiti teritoryo ti Ukraine ket maysa laeng a patibong ni Putin a kayat na ket tungpalen da.
Karaman kadagiti nasao a teritoryo a mayorya a kontrolado ti Russia ket ti Donbas region nga agtultuloy nga ilablaban ti Kyiv idiay Kremlin kasukat ti kinakapia.
Nupay kasta, immunan nga inwaragawag ni US President Donald Trump a kasapulanen a maaddaan iti “swapping of territories” tapno mapasardeng ti gyera ti dua a pagilian.
Iti kallabes nga Alaska summit ket imbatad ni Kallas a naala ni Putin amin a kayat na ken mabalin a makaapekto daitoy iti interes ti negosasyon para ti peace deal, karaman ditoyen ti pannakailaksid ti Russia kadagiti sanctions.
Karaman ni Kallas ken dadduma pay a lider ti pagilian idiay Europa kas iti France, Germany, Italy, ken Finland a simmurot iti panagtataripnong da Ukrainian President Volodymyr Zelensky ken ni Trump idiay White House, sumagmamano nga aldaw laeng kalpasan ti Trump-Putin summit iti maysa a military base ti Estados Unidos idiay Alaska.
Kabayatanna, intuding met ni Trump idi kalman ti two-week time frame para ti evaluation ti peace talks ti nagbaetan ti Russia ken Ukraine.
