SAN JUAN, LA UNION – Nangrugin iti panawen ti panagitlog dagiti pawikan ditoy probinsya ti La Union kasaruno a matakuatan ti kaunaan nga umok da ita a tawen idiay Ili Sur, San Juan, agarop alas-kwatro ti parbangon idi Oktubre 13.
Nakita daitoy iti dedikado a Pawikan Patroller a ni alias “Manong Lando,” bayat a paawid manipud iti panagkalap.
Adda pakabuklan a 114 nga itlog iti nasao nga umok iti darat, ken manamnama iti panagpessa da inton kangitingitan iti Disyembre.
Gapo kadaitoy a panagrugi iti panawen ti panagiitlog dagiti pawikan, maallukoy iti publiko a pagtalinaeden a nadalus, natalna, ken nasipngeten iti igid ti baybay tunggal rabii.
Maballaagan iti amin nga adda kadagiti asideg ti baybay a liklikan paylaeng iti agpuor, agpangiwat kadagiti motorsiklo, kasta met iti agpatpatnag a silaw kadagiti pagtaengan, wenno aniaman a makadadael iti gagangay nga aglawlaw tunggal panawen iti panagitlog.
Segun iti CURMA wenno Coastal Underwater Resource Management Actions, apaman a makakita iti pawikan ket pagtalinaeden iti distansya ken dagos nga ipakaammo kadagiti maseknan nga ahensya ken organisasyon ditoy probinsya para iti umno nga obserbasyon ken panagadal. | via Bombo Rafael Galano
