Mamati ni National Bureau of Investigation (NBI) Director Melvin Matibag nga umdas iti imbaga ni Bise Presidente Sara Duterte maipapan iti panangala ti maysa a tao a mangpatay kenni Presidente Ferdinand Marcos Jr. tapno ibilang daytoy a betrayal of public trust ken impeachable offense.
Iti panagdingngeg ti Senate impeachment court, kenuna ni Matibag ng iti mismo a pangpubliko a panangaklon ni Duterte a nangkasarita isuna ti maysa a tao a mangpatay iti Presidente ket maibilang nga ebidensia ti maipagarup a panaglabsing iti naipaay a panagtalek iti maysa a nabotosan nga opisial.
Segun kenni Matibag, saan a kasapulan a mabirukan pay nga umuna ti NBI iti tao a maipagarup a kinasarita ni Duterte wenno maaddaan pay nga umuna ti sentensia iti maysa a kaso a kriminal sakbay a maikonsiderar iti nasao a waragawag iti impeachment proceedings.
Inlawlawag na a nagduma iti saritaan ti criminal investigation ken impeachment. Bayat nga agtultuloy iti imbestigasion ti NBI iti alegasion ti grave threats ken incitinig to sedition, kenunana nga iti panaglabsing iti public trust ket naisina a saritaan iti impeachment.
Nagtestigo met iti impeachment trial da NBI Senior Agent John Mark Calilung ken NBI-BARMM Regional Director Jeremy Lotoc. Ni Calilung iti nag-authenticate iti recording ti waragawag ni Duterte idi Nobiembre 23, 2024, bayat nga inbatad met ni Lotoc iti nagbalin nga imbestigasion ti NBI a nagtennag iti panangipila ti reklamo maipapan dagiti maipagarup a pangta.
Impaganetget ni Matibag nga agtaltalinaed nga aktibo ken agtultuloy iti imbestigasion ti NBI ken saan pay a natakuatan iti tao a maipagarup a nakontak tapno isayangkat iti panagpatay.
Nupay kasta, imbagana a nakadependir iti pakabigbig ti nadakamat nga indibidual iti panagkitana a mabalin a sumrek iti saritaan ti betrayal of public trust iti pampubliko a waragawag ti Bise Presidente.
Saan met kunana a rumbeng nga agbalin a basaran iti nangato a public trust rating ni Duterte tapno maimpluwensiaan iti imbestigasion. Segun kenni Matibag, ti NBI ket aggungunay maibasar iti linteg, proseso ken mandato daytoy, ken saan nga iti resulta dagiti survey.
Dagiti waragawag ni Matibag ket paset ti testimonya ti prosekusion iti Article IV ti Articles of Impeachment, a mangdakdakamat iti maipagarup a pangta ni Duterte kontra kada Presidente Marcos, First Lady Liza Araneta-Marcos ken sigud nga Speaker Ferdinand Martin Romualdez. Kalpasan ti testimonyana, pormal a lineppas ti House prosecution iti presentasion ti ebidensia daytoy iti nasao nga impeachment article.###
