BR LA UNION – Imbaga ni Bishop Gerardo Alminaza ti Diocese of San Carlos idiay Negros Occidental a ti pannaka-aresto ni sigud a president Rodrigo Duterte ket maysa kunana a gin-awa para kadagiti rinibu a pamilya a napukawan ti ipatpateg iti biag, gapu iti kontrobersyal a ‘war on drugs’ a maipagarop a nangrugi idiay Davao ken naipakat iti intero a pagilian.
Segun ti Obispo, iti pannaka-aresto ni Duterte ket manglukat ti dalan para iti hustisya ken pagsungbaten ti dadduma pay nga adda pakainaiganna iti ‘war on drugs.’
Inladawan na ti nasao a pasamak kas maysa a “nalawag a namnama” manipud iti panawen a naipatungpal dagiti iligal a pammapatay iti administrasyon Duterte a nangpataud ti buteng iti pagilian.
Impalagip pay ni Alminaza iti agtultuloy a panawagan ti Diocese of San Carlos a gibusan dagiti pammapatay ken dinakamat na nga isuna mismo ket nagbalin a testigo iti makapalupoy nga epekto ti kinadamsak.
Linagip na pay iti nagbalin a kararag a iti tabon idi ni Skyler Bladen Abatayo, maysa nga 4-anyos nga ubing a lalaki a napatay iti naiyaw-awan a bala manipud iti maysa a drug raid idiay Cebu City.
Kinuna na a malidayan daytoy para kadagiti tattao nga agtultuloy a mangsup-suporta iti naranggas a kampanya ti ‘war on drugs’, a simmaknap ti pammapatay kas solusyon ti problema itidroga.
Kabayatanna, inallokoy ni Alminaza iti publiko nga amirisen a naimbag iti pat-patien ken panunuten iti panangi-pangruna ti biag ken panang-tubngar ti simbaan Katolika iti anyaman a klase ti biddut a solusyon kadagiti problema a sangsangwen ti gobyerno.
Innayonna a napateg iti papel ti Simbaan tapno agserbi a boses kontra kadagiti saan a naingkalintegan nga aramid.
