LA UNION – Ipadpadaras ti Mines and Geosciences Bureau (MGB) ti Department of Environment and Natural Resources (DENR) Regional Office-1 iti panangilippas ti imbestigasyon iti napasamak a pannakagabor a sibibiag dagiti tallo a treasure hunters iti nauneg nga abot idiay kabanbantayan a paset ti Barangay San Fermin, ili ti Caba, La Union.
Iti pannakiuman ti Bombo Radyo kenni MGB Regional Director Socrates Gaerlan, kasapulan a mapaneknekan babaen ti maisaysayangkat nga imbestigasyon a ti inaramid nga abot dagiti tallo a biktima ket tapno agsapul iti gameng a nakaduling iti uneg ti daga.
Sigun kenni Gaerlan, nainget nga ipawpawil iti gobyerno ti panangisayangkat iti treasure hunting no awan ti pammalubos manipud ti National Museum.
Inlawlawag ti opisyal, a napeggad iti panagsapul kadagiti nakalemmeng a kinabaknang no awan ti mangbaybayabay nga eksperto iti kadagiti agkalkali.
Maysa kadagiti mabalin a makagapu iti pannakagabor a sibibiag dagiti maipagarup a treasure hunters ket iti kinaawan iti umno a pannakaammo dagitoy maipapan iti panagkali ken panangaramid kadagiti banag a pangsalaknib kadakuada iti uneg ti abut kontra iti panagreggaay ti daga.
Mabalin nga iruar iti MGB ti resulta iti ar-aramidenda nga imbestigasyon aniaman nga aldaw ita a lawas.
Kabayatan, iti met salaysay ti kabagyan ken maysa kadagiti nangiyaon iti bangkay dagiti biktima a ni Ramon Rimorin, narigatanda a nangiruar iti bagi dagiti nagaburan.
Base iti panangiladawanna, mapatta-patta nga umabot iti 60 a kadapan iti naaramid nga abot dagiti tallo a kakabagyanna.
Immabot pay iti 24 nga oras dagiti biktima iti uneg ti daga sakbayda a naiyaon iti ruar.
Sigun kenni San Fermin Barangay Chairman Pablito Valdez, maipagarup a dua a tawen metten nga agkalkali ken agsapsapol iti kinabaknang dagiti tallo a treasure hunters a pakaibilangan dagiti agama a Bonifacio Rimorin, 54 ken Jonathan Rimorin, 30; kaduada ni Wilfredo Gatchalian Jr., 59, agpapada nga agnanaed iti nasao nga ili. (Abs Flores)
