LA UNION – Mangisayangkat ti panagsukimat dagiti barangay officials ti Biday, San Fernando City tapno takwaten nu siasino dagiti indibiduwal a responsable iti pannaka-pukan dagiti bakawan idiay Purok 6 ti nasao a barangay.
Iti eksklusibo a pannakiuman ti Bombo Radyo La Union kada Barangay Kagawad Dionisio Camarao ken Abelardo Borja Jr. kinunada a nakigtotda iti report manipud CDRRMO, a napukan dagiti bakawan iti masakopan dagitoy, partikular iti waterway ken pupokan.
Segun kenni Borja, nagresponde a dagus ti konseho barangay ngem awan ti nadanon da a tao, malaksid a nakita da dagiti napukan a bakawan iti pribado a lote.
Pattien ni Borja a na-by pass ti barangay council agsipudta awan ti kimmiddaw kadakuada ti permiso para iti pannakapukan dagiti bakawan.
Inawagan na pay a pananggundaway daytoy, agsipudta makomikom da a barangay officials iti panagserbi kas frontliner gapwanan ti COVID 19 crisis, idi naipatungpal ti panagpukan ti bakawan.
Immunan a nagreklamo dagiti maseknan a residente iti Purok 6 gaputi pannakapukan dagiti bakawan.
Napateg iti bakawan iti aglawlaw wenno mangrove, agsipudta dagitoy a klase ti mula iti agserserbi a balay dagiti lames.
Malaksid pay a dagitoy ti manglapped iti napegges nga ayos ti danum ken mangdalus kadagiti waterways agsipudta sagepsepan na iti sabidong a phosphates iti danum ken dadduma pay nga organic materials.
