LA UNION – Agtultuloy ti imbestigasyon ti pulisya iti makagapu ti pannakatay ti Britist iti uneg ti kotsena a nakaparada iti asideg ti arubayan ti mabigbig a resort idiay Barangay Ili Sur, ili ti San Juan, La Union.
Nabigbig ti biktima a ni Niel Mark James, 77, madama nga agnanaed idiay Barangay Ili Norte ti nasao nga ili.
Sigun iti San Juan Police Station, agparparang iti inisyal a panagsukimat dagitoy a base iti naala a video ti CCTV camera ti nadakamat a resort, agarup alas-4:00 idi malem kalman a nagparada ken simmuar manipud ti lugan ti ganganaet.
Sumagmamano met a kanito a nagsanggir daytoy iti ruar ti luganna ken naminsan manen a simrek.
Idi madlaw dagiti mangmangged ti nasao a resort a nabayagen a saan a rimmuar ni James iti luganna ket siniripda dsaytoy ken naimatanganda nga awanan isuna ti puot kasaruno iti panangayabda iti pulis tapno agpaarayat.
Dagus a naiturong iti ospital ti Briton ngem awananen daytoy iti biag.
Iti agdama ket saan pay a nalawag iti pulisya ti makagapu iti pannakatay ti ganganaet.
