Impila ni Senador Ping Lacson ti gakat a “Parents Welfare Act of 2025” a mangipaspasiguro nga agsungbat ti linteg dagiti annak nga ibati dagiti lumakay ken bumakatenen a nagannak da iti oras nga agkasapulan dagitoy.
Panggep ti gakat a dusaen dagiti annak a saan a mangipaay ti suporta kadagiti nagannak da ken impunto ni Lacson a nupay nakasurat iti Family Code ti obligasyon a mangsupsuporta kadagiti nagannak, adu a nataengan itan ti saan da a kabaelan a suportaran ti bagbagi da nga ibatbati lattan dagiti annak da.
Nakalanad iti gakat ti Senador a mabalin a mangipila dagiti nagannak ti petition for support iti korte para ti panangipaulog ti support order kadagiti annak a saan a mangipapaay ti suporta. Tumulong ditoy ti Public Attorney’s Office ken saanen a kasapulan pay ti panagbayad ti court fee.
Dagiti annak a saan a tumungpal iti nasao a support order ti nagsasaruno a tallo a bulan – nga awan met iti resonable a rason – ket maibalud iti maysa agingga innem a bulan ken agmulta pay iti P100K.
Dagiti met nabilin nga alagaan dagiti nagannak da ngem imbati da latta dagitoy ket makulong ti innem agingga sangapulo a tawen, malaksid pay ti multa a P300K.
