LA UNION – Sangapulo a pampasahero a dyip manipud ili a San Gabriel, La Union iti mapalubosan nga agbiyahe kada aldaw, nangrugi ita nga aldaw ti Sabado nga isumet ti umuna nga aldaw nga implementasyon ti Modified Enhanced Community Quarantine (MECQ) ditoy syudad ti San Fernando nga agpatinggal inton Abril 23, maiyannurot iti Executive Order No.11 Series of 2021 nga impaulog ti Provincial Government of La Union.
Iti eksklusibo nga interview ti Bombo Radyo La Union kenni Elmario Samonte, Vice-President iti asosasyon dagiti jeep idiay ili ti San Gabriel nga addaan ti ruta nga agturong ditoy syudad ti San Fernando and vice versa, pakabuklan nga 60 units dagiti agpaspasada a jeep iti ili da, ngem limitado iti 10 a unit laeng ti mapalubosan nga agbiyahe iti inaldaw, agingga a malpas ti MECQ ditoy syudad.
Segun kenni Samonte, mangrugi ti biyahe da, manipud alas 6:00 ti bigat agingga alas 6:00 ti sardam.
Ni Samonte iti nag-first trip itay bigat ngem tallo laeng iti pasaheros na a nagturong ditoy syudad.
Aminado ni Samonte a narasay manen dagiti pasaheros ken kumapsot ti birok, ngem kasapolan nga agtungpal da kadagiti allagaden ken addang a makatulong iti pananglapped ti panagsaknap iti COVID 19.
Dagiti laeng APORs a mapalubosan a rumuar kadagiti babbalay da iti makastrek ditoy syudad ken addaan ti nasisita a gagara, kas koma dagiti agturong kadagiti ospital ken botika.
Dagiti pampasahero a jeep ken bus nga agturong ditoy syudad ket saan da a mapalubosan a sumrek iti bisinidad, nudiket agpatingga da laeng iti naituding a boundary checkpoints, kas iti Pagdalagan crossing kadagiti aggapo iti abagatan ken boundary checkpoint iti Dalumpinas Oeste kadagiti aggapo iti amianan.
Adda met dagiti nakasagana a shuttle services kadagiti border checkpoints a mangitulod kadagiti mangmangged, frontliners, ken APORs iti destinasyon da ditoy syudad ti San Fernando.
Dagiti laeng tricycle for hire iti mapalubosan nga agbiyahe ditoy syudad kabayatan ti MECQ bayat a dagiti private vehicle a dumalyasat laeng ditoy syudad ket nasken a mangiparang iti valid ID ken Napanam QR code.
