Pinakdaaran ni Presidente Ferdinand Marcos Junior dagiti korap nga opisyales ken indibidwal ti gobierno nga agtultuloy nga umab-abuso ti posisyon da.
Ti waragawag ti presidente ket kasaruno ti panangidaulo na ti National Heroes Day sadiay Libingan ng mga Bayani idiay Taguig City.
Kinunana a dagiti kusit nga indibidwal ket saan laeng nga agtaktakaw ti baknang ti Pilipinas nu di ket patpatayen da pay ti masakbayan dagiti agtutubo kasta met a daddadaelen na ti arapaap dagiti umili.
Impaganetget ti lider a saan a rumbeng a maiyaleng-aleng dagiti babassit a panangallilaw agsipud ta in-inut na daitoy a dadaelen ti komunidad nu mabaybay-an.
Nagpanawagan ni Presidente Marcos iti nagkaykaysa a panaglaban kontra ti panangabuso ti posisyon ken karbengan dagiti tattao kasarnuno ti panangiyunay-unay ti kinapateg a masurwan manen dagiti agtutubo seknan kadagiti promblema ti aglawlaw da.
Kabayatanna, saan met nga agtalna iti administrasyon agingga adda dagiti korap nga elemento a mangparparigat iti pagilian tapno magun-od iti hustisya.
