Mangnamnama ni Presidente Ferdinand Marcos Jr. a mariknan ita a panawen ti panagtutudo iti epekto dagiti maar-aramid a flood control projects ti gobierno idiay Metro Manila.
Kasaruno daytoy iti inspeksion ti presidente iti drainage improvement project iti Araneta Avenue idiay Quezon City, a maysa kadagiti lugar a kanayun a malaylayos uray bassit laeng iti tudo.
Segun kenni Presidente Marcos, paset ti nalawa nga “Oplan Kontra Baha” iti panangsukat kadagiti daan a drainage pipes, desiltation wenno panangpauneg dagiti agusan ti danom, ken panangipatakder dagiti pumping station tapno naparpartak a maparuar iti layos.
Innayon pay ti presidente, saan laeng a Metro Manila iti sakop ti flood mitigation projects ti gobierno, ngem naipangruna iti Manila gapu iti kaado ti residente ken dagiti apektado tunggal adda ti napigsa a tudo.
Impatungpal ti gobierno dagiti rekomendasion ti Project NOAH tapno maamuan ken maresolba dagiti lugar a kanayun a malaylayos.
Inaklon na pay a nabayagen ken nalawa ti trabaho iti flood control, ngem impaganetget daytoy a nangrugin iti seryoso nga addang ti gobierno tapno maksayan iti epekto ti panaglayos kadagiti komunidad.
