Nakasangpeten idiay India ni Presidente Ferdinand Marcos Junior para ti lima nga aldaw na a state visit.
Nagdisso iti nagluganan nga eroplano ti Presidente idiay Indira Gandhi International Airport, New Delhi agarop alas-2:20 ti malem, oras idiay India.
Kadwa na met iti panagbisita iti asawa na a ni First Lady Liza Araneta-Marcos ken ti Philippine delegation idi sinangaili ida dagiti opisyales ti India ken impaayan pay iti tradisyunal nga Indian dance.
Kalpasanna ket nagturong ni Presidente Marcos idiay Taj Mahal Hotel para ti courtesy call kenni Indian External Affairs Minister Doctor Jaishankar ken naaddaan da pay iti briefing kadagiti mapasamak iti lima nga aldaw na iti pagilian da.
Manamnama a makadwa iti presidente iti Filipino community a segun iti Department of Foreign Affairs ket dumanon ti 200 ti bilang dagiti adda sadiay New Delhi bayat a 1,356 met ti Pilipino a rehistrado idiay India.
Ita nga aldaw ti Martes ket makadkadwa ni Presidente Marcos ni Indian President Droupadi Murmu kasta met a maaddaan da iti bilateral meeting kenni Indian Prime Minister Narendra Modi nu sadino ket madakamat dagiti lider iti pagsyaatan ti India ken Pilipinas kadagiti nagduduma a tay-ak.
