Saan nga itulok iti Pilipinas a mausar iti teritoryo ken dagiti base militar a kas ‘launch pad’ ti sabali a pagilian, apaman a mapartuat iti gyera ti nagbaetan ti China ken ti Taiwan.
Daitoy iti impaganetget ni Presidente Ferdinand Marcos Junior idi dinamag dagiti foreign correspondents nu palubosan ti Pilipinas iti militar ti Estados Unidos a mangisayangkat kadagiti opensiba nga operasyon manipud kadagiti base da ditoy pagilian.
Kinuna iti Presidente nga awan iti interes ti Pilipinas a makipaset iti aniaman a gyera ken kangrunaan a tarigagay iti gobierno ket protektaran iti teritoryo ken pagtalinaeden ti kinakapia ken kinatibker ti rehiyon.
Impaganetget na a maisupadi kadagiti polisiya ti administrasyon na ti aniaman a panagraut a maiyuswat manipud ditoy Pilipinas ken dagiti adding ti Estados Unidos wenno sabali pay a pagilian ket maibasar kadagiti bukod da a foreign policy.
Innayon na nga idi pay ket konektadon iti Pilipinas ken Taiwan maipapan iti komersiyo gapo iti kaasideg da, kas maibasar ti heograpiya, nupay limitado gapo iti panagraem ti One China policy.
