BR LA UNION – Maysa a kita ti panang-karit iti Philippine Coast Guard (PCG) iti iligal a presensiya ken panaglayag ti Chinese Coast Guard Vessel 5901 iti Exclusive Economic Zone (EEZ) ti Pilipinas iti kaadayu a 60-70 nautical miles manipud itiZambales coastline.
Iti statement ni PCG Spokesperson for the West Philippine Sea Commodore Jay Tarriela, kinunana a ti 83-meter-French built PCG vessel-da a BRP Gabriela Silang ket nag-radio manen iti CCG vessel 5901 a mangipalagip kadakuada nga illegal ti ar-aramidenda ken saan a maipalubos.
Kinuna na pay a nalawag ti mensahe nga imbati ti PCG nga ‘unlawful’ ken saan nga acceptable ti panaglayagda iti EEZ ti pagilian.
Impaganetget pay ni Tarriela iti paset ti panang-radyo da iti CCG, a nalawag a nadakamat ti United Nations Convention on the Law of the Sea (UNCLOS) nu ayan a paset ti China.
Kinunana nga iti sidong daytoy, nalawag a naibaga a ti ‘freedom of navigation for foreign-flagged vessels’ ket saan a makastrek iti uneg ti EEZ ti maysa a pagilian a pakairamanan ti Pilipinas.
Kabayatanna, siniguro ni Tarriela nga agtultuloy ti takderda iti commitment nga agmonitor ken saan a palubosan dagiti illegal nga aktibidad ti CCG iti kadanuman ti West Philippine Sea.
