Pinalawa ti Philippine Coast Guard iti search and rescue operation para kadagiti walo a pasahero a mapukpukaw kalpasan ti uram iti M/V June Aster iti kabaybayan ti Coron, Palawan.
Naipamaysa iti panagbirok iti aglawlaw ti Calanhayaun Island idiay Barangay Tara ken dagiti asideg nga aplaya, babaen dagiti patrol vessels, rubber boats ken drones tapno ad-adda a mapalawa iti sakup ti operasion.
Agtultuloy met iti panangisayangkat dagiti personnel ti Coast Guard District Palawan, agraman ti Disaster Response Group, Special Operations Group, Marine Environmental Protection–Northeastern Palawan ken BRP Suluan, ti maritime ken shoreline patrols.
Nauram ti M/V June Aster idi Setiembre 9 bayat iti panagturong daytoy idiay Coron, 43 a tattao ti naispal, bayat nga agtultuloy ti search, recovery ken identification operations mainaig iti nasao nga insidente.###
