Pinagkedkedan ni PCG spokesperson Commodore Jay Tarriela ti imbitasyon ni Sen. Rodante Marcoleta para ti maysa a “friendly debate” mainaig iti West Philippine Sea (WPS) ken Kalayaan Island Group (KIG).
Impaganetget na a nalawag ken saanen a kasapulan pay a mapagdebatean ti karbengan ti soberanya ti Pilipinas kas maiyannurot iti 2016 Arbitral Award, Konstitusyon, ken kadagiti agraraira a linteg.
Sakbayna ket ni Tarriela met iti nangimbitar kenni Marcoleta a sumurot iti maisayangkat a Maritime Domain Awareness flight agturong idiay Kalayaan Island Group kasaruno a mangipeksa ti senador a mabalin a mai-surrender dagiti isla nga adda iti ruar ti EEZ.
Laksid ti panagkedked iti debate, agtaltalinaed a silulukat ti imbitasyon ni Tarriela para ti nasao a flight wenno sovereign patrol ti PCG.
Kinuna met ni Palace press officer Claire Castro a nupay saan a treason wenno panagtraydor dagiti waragawag ni Marcoleta, nangato iti posibilid iti panagkontra ti publiko kadagiti naratibo a kapada ti propaganda ti China.
