LA UNION – Pormalen a nagtugaw kas Provincial Director iti La Union Police Provincial Office ni PCol. Jonathan Calixto kalpasan ti naangay a turn-over of command ceremony idiay LUPPO Marangal Grandstand tattay bigat.
Sinukatan ni PCol. Calixto ni Outgoing Provincial Director Pcol. Jay Cumigad a maidestino idiay Camp Crame.
Ti nadakamat a programa ket dinar-ayan ni PRO-1 Director BGen. Emmanuel Peralta, ken dagiti hepe iti naduma-duma nga estasyon ti pulisya ditoy probinsiya iti La Union.
Iti nagbalin a mensahe ni PCol. Calixto, pinagyamananna ni Presidente Rodrigo Duterte, PRO-1 Director Peralta ken PNP Chief Debold Sinas para iti baro nga oportunidad tapno agserbi ken protektaran dagiti residente ditoy probinsiya.
Nagyaman met ti opisyal iti Provincial Government of La Union nga idadauluan ni Gov. Francisco Emmanuel Ortega III ken iti intero a probinsiya iti nabara a panangpasangbay kenkuana.
Impanamnama ti katugtugaw a director iti LUPPO iti panangpatalinaed iti urnos ken kappia ditoy probinsiya ken panangitultuloy iti narugian a programa iti napalabas a liderato.
Ni PCol. Calixto ket nagpaay kas Regional Intelligence Division Chief iti PRO3 ken nagtakem pay isuna idi kas mangidadaulo iti PNP Regional Highway Patrol Unit idiay Region 4-A idi tawen 2018.
Inallukoy met iti opisyal dagiti tauhan ti LUPPO iti agtultuloy a panangimplementar dagitoy ti programa iti Philippine National Police.
