A UNION – Nalpasaen a napiramaan ti memorandum of agreement iti baetan ti Philippine Drug Enforcement Agency (PDEA) ken ti lokal a gobyerno para iti pananglukat ti provincial office ti nasao nga ahensya idiay Barangay Dissoor, ili ti Bauang, La Union.
Kabayatan iti panagbitla ni PDEA Director General Wilkins Villanueva, impeksana ti panagyaman iti Bauang Municipal Government gapu iti panangawatda a mailukat nasao nga opisina.
Sigun kenni Villanueva, namnamaen dagiti umili a nalakadan a makaasideg iti PDEA Provincial Office no adda ti pakaseknan dagitoy.
Kabayatanna, nakaragsakan met ni Mayor Menchie de Guzman iti pananglukat ti baro nga opisina iti masakupanna a lugar gapu saan laeng a dagiti taga-Bauang ti mabalin nga agkamang no di ket dagiti amin nga agindeg iti probinsya.
Impeksa met ti alkalde iti panangikagumaan nga agbalin a drug free ti Bauang.
Malaksid iti pakaseknan ti nadakamat nga opisina ti PDEA, karaman iti linaon ti memorandum of agreement ket iti wagas a panangpapigsa ti kampanya kontra iti iligal a droga ti lokalidad.
