LA UNION – Agtultuloy a dukduktalen dagiti otoridad iti pakabigbigan ti suspek nga agiwarwaras iti peke a P1,000 bills kalpasan a mabiktima dagiti sumagmamano a negosyante iti uneg ti mabigbig a mall idiay syudad ti San Fernando, La Union.
Naammuan ti Bombo Radyo manipud iti saanen a nagpabigbig a sales lady, maipagarup a gimmatang kadakuada iti maysa a pares ti tsenelas nga agbalor iti P130 ti lalaki a nagpammarang a customer ken naiyawat kenkuana ti P1,000 bill.
Idi a maited iti sales lady ti sukli ket dagus a naglibas ti suspek.
Nadiskobre nadiskobre laengen a peke ti kwarta nga imbayad kenkuana ti costumer kalpasan nga impaammirisna daytoy iti kaabay nga stall nga addaaan ti electronic money bill currency detector.
Sigun ket ti maysa a service crew ti food court, kaad-adduan ti costumer idi nga immasideg kadakuada ti suspek ken gimmatang iti taraon nga agbalor ti P200 kasaruno iti panangiyawat ti P1,000 bill kas bayad.
Dagus met a pimmanaw ti suspek idi a maalana ti sukli.
Arigna nga agpada iti panangiladawan iti dua ti suspek a nangallilaw kadakuada.
Mangnamnama met dagiti biktima ken dagiti otoridad a matiliw ti lalaki a maipagarup nga agiwarwaras iti peke a kwarta.
