LA UNION – Rugyanen ti PENRO La Union nga imbestigaran iti naaramid a pannaka-uging dagiti sanga ti centennial tree, a masarakan iti uneg ti Carcarmay Central School idiay Bacnotan, La Union.
Iti pannakiuman iti Bombo Radyo La Union kenni Forester Randy Bolesa ti PENRO La Union, kinunana a kitaen da a naimbag iti pudno a napasamak ken kasarita da dagiti maseknan.
Nu adda mapaneknekan a naglabsing ket sumango dagitoy iti maitutop a kaso.
Impaganetget ni Bolesa a sakbay koma a nauging dagiti sanga ti centennial tree wenno anya pay ti paka-aramidan na ket masapol nga ipakaammo nga umuna iti LGU, PENRO wenno DENR.
Impeksa met ni bolesa ti pannakakellaat ken pannakadismaya da iti panaguging da kadagitoy a sanga iti centennial tree.
Immuna metten a nangipeksa ti pannakadismaya ni Punong Brgy. Isidro Bucsit ti Brgy. Carcarmay iti ili a Bacnotan, La Union iti nasao a pasamak ken saan kunana a naipakada daytoy kenkuana.
Base iti impormasyon a nakalap ti Bombo Radyo, maysa a lawasen a malutluto ti uging iti uneg mismo iti pagadalan.
Nupay kasta, awan pay ti nailako manipud kadagiti nauging a sanga ti centennial tree.
Iti met panagturong ti Bombo Radyo La Union News Team iti mismo a pagadalan, nagkedked nga agpainterview iti camera iti principal ti pagadalan a ni Ms. Myrna Cardinez.
Nupay kasta impaganetget na, nga impalinis na laeng dagiti sanga ti nasao a kayo ket saanna a ninamnama a nauging dagitoy.
Maipalagip a naspak wenno nagiray dagiti sanga ti centennial tree idi bulan iti Agosto.
