Dimmanonen iti ₱9.99-bilyon iti perdision ken pannakalugi iti sektor ti agrikultura ditoy Pilipinas gapu iti El Niño, a manamnama nga agtultuloy agingga umuna a paset ti tawen 2027, maibasar iti kaudian a datos ti Department of Agriculture (DA).
Maibasar iti panagpatta-patta ti regional office ti DA, 324,327 a mannalon iti apektado, bayat a 323,419 nga ektarya dagiti talon iti naperdi kadagiti nadumaduma a rehiyon ti pagilian.
Kadakkelan a nailista ti pannakalugi iti mais a dimmanon iti ₱5.63-bilyon, bayat a ₱3.65-bilyon met iti perdision ti pagay.
Manamnama a bumaba iti 18.6-milyon a metriko tonelada iti produksyon ti pagay ita a tawen 2026, wenno aganay maysa a milyon a metriko tonelada a nababbaba nu iyarig idi 2025.
Mapatta-patta a bumaba met ti 500-a ribu a metriko tonelada iti produksyon ti mais gapu iti nangato a gastos iti fertilizer ken gasolina, kasta metten iti saan a nasayaat a kondisyon ti panawen.
Nakailista met ti ₱655.74-milyon a pannakalugi kadagiti high-value crops, kas ti nateng, saba, ken pinya, bayat a ₱40.83-milyon met iti perdision iti livestock ken poultry wenno dagiti taraken nga ayop ken manok.
Laksid daitoy, kinuna ti DA a nakaitukon dan ti ₱18.64-bilyon a gatad ti tulong ken interbensiyon para iti sektor ti agrikultura, karaman dagiti agricultural input wenno arawaten a pang-mula ken ₱6.26-bilyon a financial assistance.
Agsagsagana met iti ahensya ti aganay ₱62-bilyon nga action plan tapnu makissayan iti epekto ti El Niño iti suplay ti taraon ken pagbiagan dagiti mannalon.
