LA UNION – Pabor ti Public Employment Service Office La Union iti deployment ban nga ipatpatungpal ti gobierno kontra kadagiti Overseas Filipino Workers idiay pagilian ti Kuwait.
Kasaruno daytoy iti pannakatay ti OFW a ni Jeanylyn Villavende.
Iti pannakiuman ti Bombo Radyo La Union kenni PESO La Union manager Charito Dator, inbatad na a positibo daytoy iti ar-aramiden nga addang ti gobierno.
Kinuna na a babaen ti deployment ban ket maprotektaran dagiti adda plano na nga agturong iti nasao nga pagilian tapno agtrabaho.
Innayon na pay, manmano metten ti agap-apply idiay Middle East gapu iti nadumaduma a riribuk sadiay.
Kabayatan na, gudua met iti reaksyon dagiti OFWs maipapan iti panangipatungpal ti deployment ban.
Nupay kasta, impaganetget ni Dator a kasapolan a protektaran dagiti OFWs iti nadumaduma a pagilian manipud iti pannakamaltrato ken anyaman a kita ti diskriminasyon.
