BR LA UNION – Maysa nga abogado ti nangipila iti petisyon idiay Korte Suprema tapno kiddawen a mangiyisyu ti court order a mangbilin iti Senado nga aksiyunan a dagus iti kaso nga impeachment kontra kenni Bise Presidente Sara Duterte.
Iti petisyon nga inpila ni Atty. Catalino Generillo Jr., kiniddawna iti korte a mangipaulog iti writ of mandamus tapno dagus nga ag-convene dagiti Senador kas impeachment court ken dagus a mangisayangkat ti public trial kalpasan ti pannakaipila ti kaso ti impeachment babaen ti Kamara de Representantes.
Kinuna ni Atty. Generillo nga awan ti sagsagabaen a diperensiya iti bagi dagiti Senador, pisikal man wenno mental, a manglapped koma kadakuada nga ag-convene kas impeachment court, isunga rumbeng a mangangay a dagus ti public trial tapno maammuan no nakabasol wenno saan ti Bise Presidente.
Impaganetget pay ti abogado a nausar iti konstitusiyon ti sao a “forthwith” a kayatna a sawen ket “immediately, at once, instantly ken straight away” iti probisyon na iti impeachment case.
Kabayatanna, saan met a mamati ni sigud a SC Senior Associate Justice Antonio Carpio a kabaelan a piliten ti SC iti Senado nga aksyunan iti impeachment case.
Immunan nga imbaga ni Senate President Chiz Escudero a saan a rumbeng a diktaran wenno imando dagiti House members iti Senado a dagus nga aksyunan dagiti alegasyon gaput inabot pay ti sumagmamano a bulan sakbay a napag-desisyunan ti House members nga i-impeach ni VP Sara.
