LA UNION – Nagkiddaw iti pannakaawat manipud kadagiti agindeg ti probinysa iti Provincial Government of La Union (PGLU) maipapan ti naladaw a panangipaay ti advisory maipapan iti General Community Quarantin (GCQ).
Iti pannakiuman ti Bombo Radyo kenni Provincial Information Officer Adamor Dagang, kinunana a saanda a nakaipaay ti advisory sumagmamano nga aldaw wenno oras sakbay a maikkat iti sidong ti Enhance Community Quarantine (ECQ) ti probinsya gapu ta adda iti surat a naipatulod iti IATF nga agkidkiddaw nga ilayon daytoy gapu pay laeng iti kaadda dagiti maag-agasan a COVID-19 patient iti uneg ti probinsya.
Sigun kenni Dagang, naguray ni Gov. Pacoy Ortega III ken iti sibubukel a lokal a gobyerno ti probinsya agingga iti dis-oras iti rabii maipapan ti sungbat iti IATF ngem awan ti naurayda a pangngeddeng no patgan nga ilayon ti EQC iti La Union.
Inlawlawag ni Dagang, a ti nasao a kadawatan iti PGLU ket maiyannurot iti pagayatan ti kaadduan nga alkalde iti probinsya.
No pay limmukay iti sasaanden ti probinsya gapu iti GCQ, kiniddaw ti opisyal nga agtungpal kadagiti protocol tapno maliklikan nga agwaras ti virus.
