LA UNION – Naipasidong iti state of calamity iti intero a probinsiya ti La Union babaen iti pananagipasa ti provincial board iti Resolution No. 362-2020.
Daytoy ti kinumpirma iti eksklusibo a pannakiuman ti Bombo Radyo La Union kenni Provincial Information and Tourism Officer Adamor Dagang.
Inlawlawag na a ti pannakaideklara nga under state of calamity iti La Union ket maysa a mitigating measure wenno wagas tapno mausar ti calamity fund iti LGU, ket mausar a paggatang kadagiti kasapolan nga arwaten, a makatulong iti pananglapped iti panagawaras ti makapatay a virus (COVID 19).
Kinapudno na, immunan nga indeklara ni PRRD iti state of calamity iti intero a pagilian gapwanan ti agtultuloy a panagngato ti kaso ti COVID pandemic ditoy Pilipinas.
Libre a pagluganan, ipaay ti PGLU mangrugi ita nga aldaw
LA UNION – Mangrugi ita nga aldaw ti Miyerkoles, Marso 18, mangipaay ti Provincial Gov’t. of La Union iti libre a pagluganan para kadagiti apektado a mangmangged iti pannakaipatungpal ti curfew hour ken panagsardeng iti public transport, partikular iti malem kas maiyannurot iti agraraira nga Enhance Community Quarantine iti intero a Luzon.
Iti pannakiuman ti Bombo Radyo kenni Provincial Information and Tourism Officer Adamor Dagang, kinuna na a tallo iti naituding a meeting points ditoy probinsiya a pakasukunan dagiti mangmangged.
Dagitoy ket idiay Rosario plaza, Burgos Plaza, ken Sudipen Plaza to San Fernando iti oras nga alas 6:00 am; 2:00 ti malem; ken alas 10:00 ti rabii.
Dagiti kangrunaan a mabenipisyaran iti libre a pagluganan ket dagiti health workers/personnels iti naduma-duma nga ospital.
Kabayatanna, agtaltalinaed a zero-death iti COVID pandemic ditoy probinsiya a La Union, malaksid laeng kadagiti mamon-monitor ken maim-imbestigaran a sumagmamano nga indibiduwal.
Iti kauddian a datus a naawat ti PGLU segun kenni Provincial Information and Tourism Officer Adamor Dagang, adda iti 22 a PUIs, 7 dagiti strict home quarantine; 7 iti agur-uray iti resulta ti COVID test, walo iti nag-negatibo iti test ken nakarwar dan iti ospital; ngem adda iti 1,453 a PUMs a kaadwan manipud iti nasao a bilang ket dagiti nagawid ditoy la Union manipud iti lugar nga adda iti kaso ti COVID 19.
Iti pannaka-monitor ken pannakabantay dagiti nasao nga indibiduwal ket trabaho dagiti barangay officials ken barangay health workers, kas maiyannurot iti linaun ti proklamasyon ni Pres. Rodrigo Duterte itay nabiit nga iti intero a Luzon ket naipasidong iti Enhance Community Quarantine.
