LA UNION — Rinambakan ti Provincial Government of La Union babaen ti Provincial Social Welfare and Development Office ti maikalima nga anibersario ti Bahay Pag-asa Center idiay Bacnotan idi Hunio 30 kas panangbigbig iti agtultuloy a rehabilitasion ken panangiwanwan kadagiti Children in Conflict with the Law, Children at Risk, ken dadduma pay nga agtutubo nga agkasapulan ti suporta.
Iti nasao a programa, inpaganetget da PSWD Officer Ranilo P. Ipac ken Assistant Department Head Nicholas G. Perlas ti kinapateg ti panangiwanwan, suporta, ken rehabilitasion tapno maisagana dagiti agtutubo para iti panagsublida iti komunidad. Napagsasaritaan pay ti napateg nga akem ti pamilia iti panagbalbaliw dagiti agtutubo babaen ti panangidaulo ni Social Welfare Officer I Lerma Navarro.
Paset pay ti selebrasion ti Silk Screen Printing Workshop nga indauluan ni Alternative Learning System Teacher Chrishna Ann A. Ganuelas tapno manayunan iti laing ken pagbiagan dagiti residente ti Bahay Pag-asa.
Nagyaman ni Social Welfare Officer II Rhona May M. Rillera kadagiti opisyales ti PSWDO ken dagiti pannakabagi ti nadumaduma a Municipal Social Welfare and Development Offices iti agtultuloy a suportada iti nasao a programa.
Segun iti PGLU, agtultuloy ti panangidur-as ti Bahay Pag-asa iti mision a panangipaay ti namnama, rehabilitasion, ken baro a gundaway kadagiti agtutubo nga agkasapulan iti pannarabay tapno agbalinda a responsable nga umili.###
