Inawagan ti Ministry of National Defense ti China a ti Pilipinas iti pangtataudan ti gulo idiay West Philippine Sea (WPS) kasaruno ti agtultuloy a panatignay ti panagbantay iti nasao a kabaybayan ken panangpatibker pay ti alyansa kadagiti nagduduma a pagilian.
Kinuna ni Senior Colonel Zhang Xiaogang iti China’s defense ministry, ilegal iti ar-aramiden nga okupasyon ti Pilipinas idiay Kalayaan Island Group ken pinabasol na pay ti gobierno a pangpakpakaro ti tensyon babaen kadagiti maritime patrols ken presensya iti mapagsusupiatan a teritoryo.
Daitoy ket sungbat na met iti kinuna ni Defense Secretary Gilberto Teodoro Junior a nabiit pay ket inwaragawag nga ipamaysan ti Armed Forces of the Philippines iti operasyon manipud iti internal security nga itan ket external defense, nangruna nu saan latta nga agsarsardeng ti China kadagiti agresibo a galad da.
Impaganetget ni Teodoro a mailabsing ti international law ti nine-dash line claim ti China ken impasigurado nga itultuloy latta ti administrasyon Marcos ti panangdepensa ti karbengan ti Pilipinas iti nasao kabaybayan.
Nagpakdaar met ti China a mangiyuswat da manen iti nakarkaro pay nga addang nu agtultuloy latta iti Pilipinas kadagiti inawagan da a probokasyon.
Laskid iti pammakdaar ket impaganetget latta ti Pilipinas iti bileg ti 2016 arbitral ruling a nangiwaswas iti nalawa a panagtagikua ti China idiay South China Sea.
