Nagsapata iti hustisya ti Philippine Army kasaruno ti pannakatay ti maysa a bagito a soldado kabayatan iti pannakaisayangkat ti traditional reception ceremony idiay headquarters ti 6th Infantry Battalion (6IB), Datu Piang, Maguindanao del Sur.
Kellat a natumba ti 22-anyos a ni Private Charlie Patigayon idi Hulyo-31 iti kangitingitan ti reception ceremony a kamaudianna ket natay metlaeng nga insigida.
Segun kenni Army spokesperson Colonel Louie Dema-ala, dagos a nangisayangkat iti bukod nga imbestigasyon ti hukbo babaen metlaeng ti panangidaulo ti dibisyon tapno madakamat ti rason ti pannaktay ti bagito a soldado.
Kinuna ti Philippine Army a sursuroten da iti ‘zero-tolerance policy’ kadagiti aktibidad nga adda iti pangta ti biag dagiti tao da, kas indatag ti Anti-hazing Act of 2018.
Kabayatanna, temporario metten a naikkat dagiti soldado a posible a karaman iti kaso kabayatan nga agtultuloy iti imbestigasyon. Karaman kadaitoy dagiti sumagmamano nga senior personnel ti nadakamat nga army division kasta met dagiti nasurok 20 a sabali pay a soldado.
Maibasar iti pisyal a military report, nag-collapse ni Patigayon kabayatan ti reception rites a naisayangkat ti Hulyo-31 ken dagos a naiturong idiay Camp Siongco Hospital iti uneg ti 6th Infantry Battalion. Kinabigatanna ket naideklara ni Patigayon a pimmusayen ken agparparang iti medical findings a kidney failure ti rason ti pannakatay na.
Mainaig iti daitoy, awan met iti senyales ti physical abuse isu a kitkitaen dagiti imbestigador nu naabuso iti soldado sakbay pay a nangrugi ken malpas ti opisyal a reception rites.
Iti agdama ket mangisaysayangkat metten ti bukod nga imbestigasyon iti kapulisan kabayatan a maur-uray iti autopsy report ti pannakatay ni Patigayon.
