LA UNION – Nakasaganan ti militar a mangipatulod kadagiti kanayunan a pwersa tapno tumulong a mangipaay ti seguridad para iti tartarigagayan a kinakapya ti panawen iti eleksyon ditoy Ilocos region.
Kinuna ni BGen. Krishnamurti Mortela, commander ti 702nd IB, 7th ID ti Philippine Army, malaksid kadakuada a suldado ket karaman dagiti army reservist iti nakasagana nga agbantay lalo iti aldaw ti binutusan kadagiti maibilang kas areas of immediate concerns.
Pinunas met ni Mortela, iti panagdanag dagiti umili manipud iti gandat a panangriribok dagiti rebelde a grupo iti panawen ti eleksyon.
Awan ti kabaelan iti nasao a grupo a mangisaknap ti kinadamsak iti Ilocos Region gapu ta dagitoy ket adda nga aglemlemmeng iti paset ti Cordillera.
