LA UNION – Impanamnama iti liderato ti Coast Guard District Northwestern Luzon (CGDNWL) a nakasaganan dagitoy para ti idadalapus ti bagyo Pepito iti Amianan a Luzon.
Kagiddan iti panangisayangkat ti Dugong Bombo idiay kampo iti CGDNWL idiay syudad ti San Fernando, La Union ket nangipaay metten iti palagip ni Commodore Genito Basilio kadagiti beach goers ken mangngalap a saan pay a tumapod iti baybay agingga a saan pay a nakapanaw manipud iti pagilyan ti nadakamat a bagyo.
Sigun kenni Commodore Basilio, nakasagana metten dagiti alikamenda ken tauhan iti kabaybayan ti Amianan a Luzon, ken padpadaananda ti agbalin nga epekto iti bagyo Pepito.
Kabayatanna, uray no adda iti sumangbay a bagyo ken natuloy latta iti blood letting project ti Bombo Radyo a Dugong Bombo idiay kampo ti CGNWL.
Dinayaw ken nangipeksa iti suporta ni Commodore Basilio iti Bombo Radyo ken Philippine Red Cross gapu ti panangisayangkat iti Dugong Bombo a makatulong kadagiti agkasapulan iti dara kangrunaan iti panawen ti kalamidad.
