LA UNION – Ikag-kagumaan ita iti Phil. Dental Association (PDA) La Union Chapter a papigsaen pay dagiti programa da nga adda pakainaigan na iti umno a panangaywan ti ngipen.
Daytoy ket babaen iti pannaki-koordinar da kadagiti barangay health workers tapno nalaklaka a maidanon ti tulong a maiparbeng, kangrunaan na kadagiti ubbing ken masikog.
Iti eksklusibo nga interview ti Bombo Radyo La Union kenni Dra. Rechilda Ariz, pangulo ti PDA-La Union, Dra. Maritess Galacio, ken Dra. Nora Peñaflor, impaganetget da iti kinapateg ti umno a wagas iti pangsepilyo ken panagbisita iti dentista, dua a daras iti uneg ti maysa a tawen.
Impaganetget da nga importante nga ubing pay laeng ket masurwan ken masanayen dagitoy nga agsepilyo tapno maaywanan ti ngipin agingga a tuma-eng.
Uray kadagiti masikog, a nasken nga agbalin a nasalun-at dagiti ngipen tapno saan a maapektaran iti sikog ken saan a managsakit dagiti ipasngay nga ubbing.
Imbinglay da pay a mas epektibo iti saan a panag-mulomog kalpasan nga ag-sepilyo tapno umipekto ti flouride a panglaban iti caries, ngem nasken nga ag-mulomog a nasayaat sakbay nga ag-sepilyo.
Naamwan a base iti panagadal, maikadwa ti Pilipinas iti intero a lubong nga addaan ti kaadwan a dental caries agsipudta kaadwan ket saan nga aware iti umno a panangaywan ti ngipen ken saan unay a maipapaayan ti prayoridad iti oral health care ditoy pagilian.
