Nagballaag iti Embahada ti Pilipinas idiay Francia kadagiti Pilipino kontra iti ilegal a sugal ken pallot kalpasan a mapakaammuan ti French authorities maipapan kadagiti aktibidad a pakairamraman dagiti sumagmamano a Pinoy.
Segun iti embahada, adda met dagiti reklamo mainaig iti panangriribok iti kinatalna ti komunidad ken panangibilleng ti basura a mainaig kadagiti nasao a panagtitipon.
Palagip ti embahada, ilegal idiay France iti pallot ken maibilbilang nga animal cruelty.
Maibasar iti agdama a French Penal Code Article 521-1, mabalin a mapatawan ti agingga tallo tawen a pannakaibalud ken 45,000 Euro a multa iti mapaneknekan a mangaramid ti nakaro a panagmaltrato wenno cruelty kadagiti ayup.
Inallukoy ti embahada iti Filipino community a suruten dagiti paglintegan ti France tapno maliklikan iti legal a problema ken mapagtalinaed iti napintas a relasionda iti host country.###
