Nadakamaten ti Quick Response Team ti Philippine Institute of Volcanology and Seismology (PHIVOLCS-DOST) iti fault a nangigubuay ti makadadael a magnitude 6.9 a ginggined idiay Cebu idi rabii ti Martes, Setyembre 30.
Segun iti ahensiya, natakuatan ti bunggoy da ti maysa nga onland extension fault sadiay Sitio Looc, Barangay Nailon, Bogo City, a kakaruan a dinayeg ti ginggined. Ninaganan da daitoy a baro a takuat a fault kas “Bogo Bay Fault.”
Naobserbaran da ti fault scarps, open cracks, ken small pressure mounds ti nagbaetan ti 2-meter-wide a deformation zone.
Nailista ti field mapping ti aganay 200 a metro ti surface rupture bayat a dagiti met drone surveys ti nangibutaktak a ti fault ket mabalin nga umabot pay ti 1.5km.
Ipakpakita daitoy dagiti senyales ti right-lateral movement. Madama paylaeng ti field verification tapno madeterminar met ti full extent ti nasao a rupture.
Iti agdama ket nakairekord ti Phivolcs ti nasurok nga 4,300 aftershocks manipud iti panagdayeg ti magnitude 6.9 a ginggined. Addaan dagitoy ti kapigsa manipud magnitude 1.0 agingga 5.1.
Agtultuloy met ti ballaag ti ahensiya iti publiko nga agtalinaed a nakaalerto agsipud ta nupay kumapsoten ti kapigsa dagiti aftershocks ket posible latta nga adda dagiti sumaganad pay a napipigsa a panagdayeg.
