SIYUDAD TI SAN FERNANDO, La Union — Inyusuat ti Gobierno Probinsial ti La Union (PGLU), babaen ti Provincial Health Office (PHO), ti nadumaduma a health interventions para kadagiti staff ti gobierno probinsial kas paset ti panagrambak iti National No Smoking Month idi Hunio 25, 2026.
Naangay ti programa iti Speaker Pro Tempore Francisco I. Ortega Provincial Legislative Building a nakaipaayan dagiti empleado iti nadumaduma a serbisio ti salun-at tapno maitandudo ti health and wellness iti pagtrabahuan.
Paset ti gannuat iti agtultuloy nga staff screening kalpasan ti Philippine Package of Essential Non-Communicable Disease Interventions (PhilPEN) screening a naisayangkat iti umuna a kuarter ti tawen. Panggep daytoy a parang-ayen ti nasapa a pannakaduktal ken nasinged a panangmonitor kadagiti saan a makaakar a sakit babaen ti panangusar kadagiti datos a naurnong manipud iti nasapsapa nga iskrining.
Nangisayangkat iti PHO ti health caravan a naipamaysa iti cancer awareness ken nasapa a pannakaduktal dagiti sakit a mainaig iti kanser. Nagtitinnulong ni Dr. Sean Patrick De Guzman, Radiation Oncologist ken Consultant ti Philippine Oncology Center Corporation, a nangidaulo kadagiti medical consultations ken special tests.
Karaman kadagiti serbisio a nakapauneg dagiti laboratory ken diagnostic examinations kas iti blood test ken electrocardiogram wenno ECG, kasta met iti dental servises. Nangted met dagiti eksperto ti salun-at iti balakad maipapan iti pananglapped iti kanser ken panangtingiting kadagiti posible a peggad iti salun-at.
Malaksid iti serbisio medikal, adda pay libre a pukis ken therapeutic massage para kadagiti staff kas paset ti programa a nairanta a mangitandudo iti sapasap a salun-at ken pagimbagan dagiti empleyado ti Gobierno Probinsial ti La Union.###
