LA UNION – Insingasing ti maysa a maseknan nga umili ditoy syudad ti San Fernando, a ni Mr. Johnny Go, a bantayan dagiti seafarers a sumang- sangpet iti pier ditoy syudad, a kasapolan a maipasidong dagitoy iti scanner, maysa nga instrumento a mang-detect iti temperatura wenno adda sag-sagabaen a sakit.
Reaksiyon daytoy ni Go gapu iti panagraira ti sakit a novel coronavirus a maaw-awagan itan kas Covid-19.
Inladawan na iti sakit a nakaam-amak ken saan a bareng-bareng, a kas met laeng kunana iti pinataud a buteng idi timpuar ti sakit a dengue.
Malaksid iti pier, uray koma kunana dagiti pagadalan ket ag-secure iti scanner a mang-detect iti kondisyon ti salun-at ti maysa a tao.
Inapreciar ngamin ni Go iti ipatpatungpal a precautionary action iti Ilocos Training and Regional Medical Center (ITRMC) ditoy syudad, nga amin a tao a sumrek iti ospital ket dumalan iti handheld scanner tapno maamwan nu adda iti gurigor wenno nakaptan ti sakit.
Malaksid dayta, inapreciar na pay iti ar-aramiden a pammalagip ti Bombo Radyo maipapan iti kinapateg ti proper hygiene iti bagi ken iti aglawlaw tapno maliklikan dagiti sakit.
Kasayaatan pay laeng kunana dagiti precautionary action ken preventive measures a panglaban iti anyaman a sakit.
