Saanen a madalanan ti aniaman a klase ti lugan iti Piggatan Bridge idiay Alcala, Cagayan kalpasan a bimmagsak ita nga aldaw, Oktubre 6, 2025.
Maibasar iti inisial a report manipud iti Alcala Municipal Disaster Risk Reduction and Management Office, bimmigay iti rangtay bayat a lumaslasat dagiti sumagmamano a trucks.
Agdama pay laeng a maisaysayangkat iti imbestigasion tapno maamuan iti rason ti panagbagsak ken no adda ti nasaktan iti insidente.
Awan pay ti opisyal a bilang dagiti posible a biktima, ngem agtultuloy iti monitoring ti lokal a gobierno ken dagiti otoridad iti lugar.
Iti Piggatan Bridge ket maysa kadagiti kangrunaan a dalan idiay Alcala a mangkonektar kadagiti kabangibang nga ili idiay Cagayan Valley.
Nabayagen a malunglungalong iti rehabilitasion dagiti sumagmamano a rangtay iti rehiyon gapo iti kinadaan dagiti istraktura ken epekto dagiti kalamidad.
Sakbay iti insidente, immunan a nagreggaay iti Cabagan Bridge idiay Isabela a nangigubuay ti nakaro nga epekto iti transportasion ken kalakan.
Agdandanag met iti publiko gapo iti nagsasaruno a panagbagsak dagiti rangtay seknan iti kinatalged dagiti imprastraktura ti amianan a Luzon.
Kabayatanna, naipatuloden iti Alcala LGU dagiti heavy equipment tapno mangisayangkat ti clearing operations ken assessment.###
