LA UNION – Arigna blockbuster iti kaatiddog ti pila dagiti consumers a nagturong iti merkado publiko ditoy syudad ti San Fernando, La Union idi kalman gapu iti naipatungpal a ‘One entrance, One exit policy.’
Naamwan ti Bombo Radyo News Team nga iti kaatiddog ti pila ket dimmanon iti batog ti maysa kadagiti grocery store wenno daya a paset ti old market iti downtown San Fernando.
Naamwan a dagiti pulis iti nangipatungpal ti sistema a ‘One entrance, One exit policy.’
Nagturong a mismo ni PBGen. Joel Orduña, Regional Director iti PNP Region 1, iti merkado publiko tapno siguradwen a masursurot iti baro a sistema.
Iti pannakiuman ti Bombo Radyo kenni Orduña, inlawlawag na a ti nasao a baro a direktiba ket nagtaud iti DILG Secretary, a naiturong iti amin a provincial offices iti intero a rehiyon uno.
Kabayatanna, iti met interview ti Bombo Radyo kenni City Mayor Alf Ortega, kinuna na a saan nga applicable ditoy syudad iti baro a sistema, ngem maawatan da kunana iti baro a bilin ni Gen. Orduña.
Nu awan ti makita da a pagdur-asan na, ket mabalin da nga isubli ti sigud a market scheme.
