LA UNION – Madandanagan dagiti sumagmamano nga Asyano gapu iti mapaspasaran a diskirminasyon wenno racist manipud iti sabali a puli idiay London, United Kingdom.
Maysa iti Filipina worker a ni Corazon Balagot a taga Bauang, La Union iti nakapasar iti saan a nasayaat a trato iti sabali a puli manipud ti pagtratrabahuanna a pagilyan.
Base iti istorya ni Balagot iti Bombo Radyo, kabayatan nga agturtutong isuna iti trabaho ket pinagsasawan daytoy iti negra ken pabpabasolenda nga agiwarwaras iti virus iti nasao a lugar.
Liniklikan laengen daytoy ni Balagot ken intuloyna ti nagbiyahe ngem makasangit isuna kabayatan nga adda iti uneg ti lugan gapu ti pannakaibabain iti sango ti sabali a tattao.
Sigun pay iti Filipina worker, mabalin a napagbiddutan isuna kas Chinese isu a nakapadas daytoy ti diskriminasyon.
Malaksid kenni Balagot ket sumagmamano kadagiti padana nga Asyano iti nakapasar met ti saan a nasayaat a trato manipud iti sabali a puli gapu ti isyu iti coronavirus disease.
Iti laksid ti napasaran a diskriminasyon sadiay ket mamati daytoy a saan isuda a baybay-an dagiti otoridad ti London tapno protektahan.
