Ikonkonsiderar ti Pilipinas iti panagangkat ti langis manipud idiay Russia kas paset ti panagbirokda kadagiti baro a pagalaan ti fuel supply, segun ti Department of Foreign Affairs (DFA).
Daytoy nga addang ket gapu iti panggep a pababaen ti lokal a presio ti lana ken masiguro iti supply.
Iti agdama, aggapo idiay Middle East ti 98% a krudo ti pagilian a naapektaran iti gubat iti nagbaetan ti Estados Unidos, Israel, ken Iran.
Makitkita iti gobierno ti Russia kas potensial a supplier tapno mapababa iti presio ti petrolyo iti merkado.
Segun kenni Energy Secretary Sharon Garin, nakiuman ti Philippine National Oil Company (PNOC) iti Russian oil nupay saan pay a napagsasaritaan dagiti detalye ti posible a kaadu wenno kapaut ti suplay.
Iti agdama, segun iti sekretario, maur-uray pay laeng ti sungbat ti Russia.
Malaksid iti daytoy, makikokoordinar pay ti pagilian kadagiti dadduma nga exporters kas iti Thailand, Japan ken Singapore tapno masigurado ti umdas a suplay bayat nga agtalinaed ti pababaliw a presio iti sangalubongan.###
