Indauluan ti Pilipinas babaen ti Department of Finance (DOF) ken Bangko Sentral ng Pilipinas (BSP) iti ASEAN Finance and Central Bank Deputies’ Meeting – Working Group (AFCDM-WG) tapno maitandudo iti napigpigsa a panagkaykaysa pinansial ti Southeast Asia.
Iti panagtaripnong a naiganuat idi Pebrero 13, 2026, impaganetget ni DOF Undersecretary Joven Balbosa nga iti kangrunaan a panggep ti pagilian ket tapno masigurado a dagiti regional cooperation ket mangted ti konkreto a benepisio para kadagiti negosio, investors, ken tunggal umili ti ASEAN.
Dagiti kangrunaan a prioridad iti nadakamat a meeting ket dagiti cross-border payments a nairanta a mangpapartak ken mangpalaka dagiti pinansial a transaksion iti nagbaetan dagiti pagilian; panangpalawa ti pannakagun-od kadagiti pinansial a serbisio para iti ad-adu a tattao ken panangpapigsa iti abilidad ti rehion a mangtaming kadagiti krisis ti ekonomia, panagdur-as ti merkado tapno suportaran dagiti panagpuonan ken, napaut a panagdur-as.
Kas co-chair, paset met iti panangidaulo ti BSP Managing Director a ni Thomas Benjamin Marcelo tapno iduron dagiti tignay a mangpapigsa iti polisia ken panagtitinnulong dagiti ekonomia ti ASEAN.
Dagiti katulagan idiay Bohol ket maipangato iti ASEAN Finance and Central Bank Deputies’ and Governors’ Meetings iti ngudo ti tawen kas paset ti panangibangon ti inklusibo ken natalged nga ASEAN Economic Community (AEC).###
